ठाकरे गट शिवसेनेचे मुख्याधिकाऱ्यांना निवेदन
फेरनिविदा प्रसिद्ध करण्याची मागणी
गडहिंग्लज (प्रतिनिधी): गडहिंग्लज नगरपालिकेने २ कोटी ३५ लाखाच्या कामांची काढलेली टेंडर प्रक्रिया संशयास्पद असून याची चौकशी करावी व फेरनिविदा प्रसिद्ध करावी अशी मागणी शिवसेनेच्या (उद्धव बाळासाहेब ठाकरे गट) वतीने मुख्याधिकारी स्वरूप खारगे यांच्याकडे निवेदनातून करण्यात आली आहे.
या निवेदनात म्हटले आहे की, गडहिंग्लज नगरपालिकेने २ कोटी ३५ लाखाचे गुपचूप टेंडर काढले आहे. यामध्ये स्टेशनरी पुरवणे, छपाई, स्मृतिचिन्ह, बॅनर ७ लाख ३५ हजार, भटक्या कुत्र्यांच्या नसबंदीसाठी पाच लाख, बांधकाम खात्याकडे सुपरवायझर नेमण्यासाठी सहा लाख, जलतरण तलाव चालवणे, देखभालीसाठी सहा लाख, कर विभागाकडे सेवा पद्धतीने तीन कुशल मदतनीस पुरविण्यासाठी सहा लाख, संगणक परिचालक पुरविण्यासाठी दहा लाख, उद्यानातील झाडांची देखभाल व इतर कामे करण्यासाठी २२ लाख, पाणीपुरवठा विभागासाठी विविध ठिकाणी काम करण्यासाठी ६० लाख तर साहित्य खरेदीसाठी १५ लाख, पालिकेच्या विविध वाहनांवर व फायरमन पुरवठा करण्यासाठी वीस लाख, शहरात रस्त्याकडेला लावलेल्या झाडांची देखभाल व अनुषंगिक कामे करण्यासाठी वीस लाख असे एकूण २ कोटी ३५ लाखाचे टेंडर प्रसिद्ध केले आहे.
मात्र टेंडरमध्ये बहुतांशी विविध विभागाकडे मनुष्यबळ पुरविणे हाच प्रमुख हेतू असल्याने यात 'गोंधळ' घालण्यासाठी गुपचूप टेंडर काढण्यात आल्याचा आरोप निवेदनात करण्यात आला आहे. या प्रकरणाची रीतसर चौकशी करून संबंधितांवर कारवाई करण्यात यावी. सदर कामांची फेरनिविदा प्रसिद्ध करण्यात यावी अशी मागणी शिवसेनेने या निवेदनातून केली आहे.
निवेदन देतेवेळी शिवसेनेचे सहसंपर्कप्रमुख प्रा. सुनील शिंत्रे, तालुकाप्रमुख दिलीप माने, शहर प्रमुख संतोष चिकोडे, उपशहर प्रमुख काशिनाथ गडकरी, संदीप कुराडे यांच्यासह शिवसैनिक उपस्थित होते.
