कोल्हापूर : वार्षिक बाजारमूल्य दर तक्ते दरवर्षी 1 एप्रिल रोजी प्रसिध्द होत असल्याने दुय्यम निबंधक कार्यालयात मार्च महिन्यात दस्त नोंदणीसाठी पक्षकारांची गर्दी होत असते. तसेच महत्वाच्या सणामुळे दस्त नोंदणीसाठी दुय्यम निबंधक कार्यालयात पक्षकारांची गर्दी वाढत आहे. हे लक्षात घेवून आणि आर्थिक वर्ष 2024-25 या वर्षाचा इष्टांक पूर्ण करण्याच्या दृष्टीने राज्यातील सर्व दुय्यम निबंधक कार्यालये दि. 29 ते 31 मार्च 2025 या सार्वजनिक सुट्ट्यांच्या दिवशी सुरु ठेवण्यात येणार आहे. शासकीय सुट्ट्यांच्या दिवशी कार्यालय सुरु राहणार असल्याने संबंधित नागरिकांनी याचा लाभ घ्यावा, असे आवाहन सह जिल्हा निबंधक तथा मुद्रांक जिल्हाधिकारी बाबासाहेब वाघमोडे यांनी केले आहे.
