⛔हद्दवाढ भाग तसेच शहरातील नवीन भागामध्ये मुबलक पाणी पुरवठा होण्यास सोयीचे होणार
⛔मुख्याधिकारी स्वरूप खारगे व नगर पाणी पुरवठा अभियंता अनिल गंदमवाड यांची माहिती
गडहिंग्लज (प्रतिनिधी): राज्य शासनाकडून गडहिंग्लज शहरासाठी ४६.६२ कोटी इतक्या रक्कमेच्या पाणी पुरवठा योजनेस प्रशासकीय मंजूरी मिळाली आहे.अशी माहिती प्रशासक तथा मुख्याधिकारी स्वरूप खारगे व नगर पाणी पुरवठा अभियंता अनिल गंदमवाड यांनी दिली. पाणी पुरवठा योजना मंजूर झाल्याने हद्दवाढ भागातील तसेच शहरातील नवीन भागामध्ये मुबलक पाणी पुरवठा करण्यास सोयीचे होणार आहे.
गडहिंग्लज शहराची हद्दवाढ झाल्याने तसेच शहरातील वितरण व्यवस्था जुनी झाल्याने शहराला पाणी पुरवठा करण्यास अडचणीचे होत होते. गडहिंग्लज शहरासाठी अमृत २.० अभियान अंतर्गत नवीन पाणी पुरवठा योजना प्रस्तावित करण्यात आली होती. याकरीता योजनेचे अंदाजपत्रक व आराखडे तयार करून महाराष्ट्र जीवन प्राधिकरण यांच्याकडून तांत्रिक मंजूरी घेवून महाराष्ट्र शासनाकडे प्रस्ताव सादर करण्यात आला होता. या पार्श्वभूमीवर गडहिंग्लज शहरासाठी ४६.६२ कोटी इतक्या रक्कमेच्या पाणी पुरवठा योजनेस प्रशासकीय मंजुरी मिळाली आहे.
नवीन पाणी पुरवठा योजनेत जॅकवेल बांधणे, नवीन मशिनरी बसविणे, जलशुध्दीकरण केंद्र बांधकाम करणे, एकूण ४ नवीन पाण्याचे टाकी बांधकाम करणे, एकूण ६५.४३ कि.मी लांबीचे वितरण व्यवस्था टाकणे, सौर ऊर्जा प्रकल्प बसविणे तसेच इतर अनुषंगिक कामे करण्यात येणार आहेत.
