गडहिंग्लज (प्रतिनिधी): गडहिंग्लज उपविभागातील देवस्थान जमीनधारक शेतकऱ्यांच्या विविध मागण्यांसाठी अखिल भारतीय किसान सभेच्या वतीने आज उपविभागीय कार्यालयासमोर धरणे आंदोलन करण्यात आले. यावेळी आपल्या विविध मागण्यांचे निवेदन देण्यात आले.
राज्य सरकारने कायदा करून देवस्थान इनाम जमिनी ती कसणाऱ्या शेतकऱ्यांच्या नावे करावी, कोरोना महामारीच्या काळापासून अनेक शेतकऱ्यांचा फाळा , खंड भरणे बाकी आहे तो भरण्याची शेतकऱ्यांची तयार असताना भरून घेतला जात नाही याबाबत योग्य त्या सूचना देऊन तो तात्काळ भरून घेण्याची व्यवस्था करण्यात यावी, कसबा नूल (तालुका गडहिंग्लज) येथील शेतकऱ्यांची अभिलेखातील इतर हक्काच्या सदरातून सातबारावरील नावे कोणतीही नोटीस न देता बेकायदेशीरपणे कमी केलेले आहेत वर्षानुवर्ष देवस्थान जमीन कसणाऱ्या त्या सर्व शेतकऱ्यांची नावे इतर हक्कात समाविष्ट करण्यात यावेत, कसणाऱ्या शेतकऱ्यांची नावे 7ब रजिस्टरमध्ये अद्यावत करण्यात यावीत, जमिनी कसणाऱ्या शेतकऱ्यांकडून त्यांना नोटीस न देता बेकायदेशीरपणे त्यांचा कब्जा काढून घेण्याचे प्रकार काही ठिकाणी होत आहेत त्वरित थांबविण्यात यावेत, देवस्थान जमीन कसणाऱ्या शेतकऱ्यांना संरक्षित कुळाचा दर्जा आहे परंतु स्थानिक पातळीवरील राजकारणातून या शेतकऱ्यांना सातत्याने नाहक त्रास दिला जात आहे त्यामुळे या गरीब शेतकऱ्यांना असा त्रास देण्यात येऊ नये अशा सूचना प्रशासनास देण्यात याव्यात, शेत जमिनीमध्ये सुधारणा, सिंचनाची सोय व इतर शेतीपूरक भांडवली खर्चासाठी देवस्थान जमीन कसणाऱ्या शेतकऱ्यांना पिक कर्ज व मध्यम मुदतीचे कर्ज देण्यात यावे आदी मागण्या या निवेदनातून करण्यात आल्या आहेत.
या धरणे आंदोलनात अखिल भारतीय किसान सभेचे राज्य खजिनदार उमेश देशमुख, सचिव अमोल नाईक, प्रा. आबासाहेब चौगुले, सहसचिव संदेश जाधव, जिल्हा कमिटी सदस्य तानाजीराव यादव, जिल्हा उपाध्यक्ष संभाजीराव मोहिते, ॲड. दशरथ दळवी यांच्यासह किसान सभेचे कार्यकर्ते सहभागी झाले होते.
