हलकर्णी येथे राजर्षी शाहू शेतकरी विकास आघाडीचा प्रचार मेळावा
गडहिंग्लज (प्रतिनिधी): शेतकरी सहकारी संघाची निवडणूक बिनविरोध व्हावी ही सर्व नेत्यांची मनोकामना होती मात्र अनेकांचे मनसुबे वेगळे असल्यामुळे निवडणुकीला सामोरे जावे लागत आहे. शेतकरी संघ ही आशिया खंडातील एक नंबरची संस्था होती. आजरा, गडहिंग्लज, चंदगड मधून राजर्षी शाहू आघाडीला उच्चांकी मतदान देऊया आणि राजर्षी शाहू आघाडीचे सर्व उमेदवार विजयी करूया असे प्रतिपादन आमदार राजेश पाटील यांनी केले.
हलकर्णी (ता. गडहिंग्लज)येथे शेतकरी सहकारी संघ निवडणुकीच्या पार्श्वभूमीवर आयोजित राजर्षी शाहू शेतकरी विकास आघाडीच्या प्रचार मेळाव्यात ते बोलत होते.
आमदार पाटील पुढे म्हणाले, जयकुमार मुन्नोळी हे सहकार क्षेत्राचा गाढा अभ्यास असणारी व्यक्ती आहे. समाजातील सर्व सामान्यांची कामे आपुलकीने करणारा नेता आहे. पालकमंत्री हसन मुश्रीफ यांच्यामुळे जिल्हा बँक नावारुपाला आली आहे. पालकमंत्री व आमदार सतेज पाटील यांच्यामुळे जिल्हा दूध संघाने प्रगती केली आहे. आपण कुणाचा कधीच द्वेष, राग केला नाही. मी सर्वांना सोबत घेऊन जाणारा आहे. एखाद्यावेळी संधी मिळाली नाही म्हणून नेत्याचा विश्वासघात करू नये. भविष्यात संधी मिळेल त्यासाठी संयम ठेवावा. सभासदांना मतदान केंद्रापर्यंत आणून कार्यकर्त्यांनी मतदान करून घ्यावे. असे आवाहन केले.
स्वागत व प्रास्ताविक जि. प. माजी सदस्य व उमेदवार जयकुमार मुन्नोळी यांनी केले. आमदार राजेश पाटील यांचा सत्कार जिल्हा मध्यवर्ती बँकेचे संचालक संतोष पाटील यांच्या हस्ते तर जिल्हा परिषदेचे माजी उपाध्यक्ष सतीश पाटील यांचा सत्कार जयकुमार मुन्नोळी यांच्या हस्ते करण्यात आला. यावेळी विविध मान्यवरांचा सत्कार करण्यात आला. दशरथ कुपेकर, जिल्हा बँक संचालक संतोष पाटील, जयसिंग चव्हाण, जिल्हा परिषद माजी उपाध्यक्ष सतीश पाटील यांनी मनोगत व्यक्त केले.
यावेळी प्रकाश पताडे, भरत पाटील, दीपक पुजारी, महाबळेश्वर चौगुले, विकी कोणकेरी, विविध गावचे सरपंच, सदस्य, विविध संस्थांचे पदाधिकारी, सभासद व राष्ट्रवादीचे कार्यकर्ते मोठ्या संख्येने उपस्थित होते. प्रसाद जोशी यांनी आभार मानले.
